انفلونزا الخنازير الله يبعدو عناا يارب

انفلوانزا الخنازير
انفلوانزا الخنازير (Swine Flu) و بيترمز له بالتلات حروف (SIV)دا مرض بيصيب الجهاز التنفسى بتاع الخنازير و بيسببه فيروس اسمه اورثوميكسوفيروس (انفلوانزا من النوع A).انفلوانزا الخنازير ممكن تتنقل م الخنزير العيان للانسان و ممكن كمان تتنقل من انسان لانسان تانى.الاعراض بتاعة المرض هى السخونيه و التوهان و تصلب المفاصل و الترجيع و فقدان الوعى و الصداع و الكحه و اخيرا ممكن تسبب الموت.

الفيروس الحالى اللى ممكن يصيب الإنسان قررت منظمة الصحه العالميه تسميته بفيروس : إيه(إتش 1 إن 1) - A-H1N1

الانتشار
الخنازير ممكن يجيلها انفلوانزا طول السنه بس فى الغالب بتزيد الحالات فى نهاية فصل الخريف و طول فصل الشتا، و ممكن يتنقل للبشر اللى على اتصال مباشر بالحيوان (زى عمال المزارع اللى بتربى الخنازير).

اكل لحم الخنزير ما بينقلش الفيروس و خصوصا لما يتطبخ كويس (الفيروس بيموت عند درجة حرارة 71 سيلزيوس يعنى اقل من درجة غليان المايه)، الانتشار بتاع المرض بيحصل م الخنزير الصاحى للانسان و مش عن طريق اكل اللحمه بتاعته.المرض دا بيصيب الجهاز التنفسي لما الانسان يتنشق الهوا اللى فيه الفيروس.

خلال شهرين مارس و ابريل 2009، فى 1000 شخص جالهم انفوانزا الخنازير فى الميكسيك و مات منهم اكتر من 80 واحد.فى يوم 25 ابريل 2009 فى 11 معمل اكدو وصول الانفلوانزا لامريكا و خصوصا فى المناطق الجنوبيه الغربيه و كانساس و فى حالات تانيه مشتبه فيها فى نيويورك كمان. كل بلاد العالم تقريبا ابتدت تستعد للمرض و تاخد الاحتياطات اللازمه لوقف انتشاره زى توزيع الماسكات على الناس فى الشوارع و عمل اعلانات فى التليفزيون عشان توعى الناس بالمرض و طرق انتشاره و م كمان تقليل رحلات السفر من و لـ المناطق اللى ظهر فيها المرض و الكشف ع المسافرين فى المطارات. الدوله الوحيده فى العالم اللى قررت تدبح كل الخنازير اللى على ارضها هى مصر بعد اجتماع وزير الصحه هناك مع رئيس الجمهوريه يوم 29 ابريل 2009.


العلاج
دلوقتى فى اربع ادويه بينصح بيها الاطبا للعلاج و للوقايه من انفلوانزا الخنازير:

امانتادين (amantadine)
ريمانتادين (rimantadine)
اوسيلتاميفير ( Tamiflu,oseltamivir) الجرعه : 75 مجم مرتين ف اليوم لمدة 5 ايام.
زاناميفير ( Relenza,zanamivir) الجرعه : بختين فى البؤ (مع الشهيق) مرتين ف اليوم لمدة 5 ايام.
فى ادله بتتجمع دلوقتى على ان الانواع المنتشره اخيرا من الفيروس ما بتستجيبش للعلاج بالدوايين الاولانيين و عشان كدا الاتنيين الاخرانيين هما الانسب للعلاج/الوقايه من انفوانزا الخنازير اللى انتشرت فى ابريل 2009.


التطعيم
مافيش تطعيم لحد دلوقتى ممكن يعمل لوقايه للانسان م الفيروس بس فى تطعيم بيدوه الاطبا البيطريين للخنازير و دا بيعملها حمايه لمدة سنة.




نجانا و نجاكم الله